Wafatnya Majoor Tan Tjin Kie Bagian 2

Peringetan boeat familie dari hal-hal Kedjadian jang berhoeboeng dengen
meninggalnja Padoeka Papa

Majoor TAN KENG BIE

(Majoor TAN TJIN KIE), sampe slesi dengan mengoeboer djinazatnja

---- bagian ke 2 ----

 

Di hari hauw Thie-Kong (sembajang Toehan Allah) pada 8 Februari djoega Papa ada seger dan maoe toeroet sembajang. Sebab Dokter ada bilang Papa soedah ada oemoer djangan soeka tidoer kemaleman, laat-laatnja djam 10 soedah moesti masoek tidoer, maka saja soedah matoer jang itoe malem bae saja sadja jang sembajang, tapi papa maoe djoega sembajang sendiri. Kendati saja soedah minta boeat masoek tidoer doeloe dan nanti kaloe soedah temponja maoe sembajang gampang di bangoenken, Papa keras tida maoe, bilangnja badan tida koerang apa-apa dan djoega tida ngantoek. Lantas saja minta permissie boeat berbaring doeloe, sebab saja kata jang saja ada ngantoek. Papa dengen kelihatan seneng bilang baik. Tapi ini toeladan dari saja tida di toeroet oleh Papa, sebab saja lihat Papa tinggal doedoek melek sampe pada waktoenja sembajang.

Di waktoe masih sore di itoe hari Papa ada soeroe panggil dan omong-omong diloear dengen Sianseng TAN KIM TE. Koetika toekang pat-iem soedah dateng (saban tahoen kaloe sembajang Thie-Kong ada pake pat-iem), kira-kira djam 7½, saja kloear maoe dengerken pat-iem di poekoel, saja lihat Papa doedoek sendirian, sedeng Engko (ko) KIM TE ada doedoek deket pat-iem.

Bijasanja moelai sembajang ada lebih laat dan brentinja (bakar kertas) ada lebih lama dan lebih laat, tapi ini tahoen soepaja boeat Papa tida terlaloe malem, maka baroe djam 12 soedah moelai sembajang dan djam 1½ soedah moelai bakar kertas.

Bijasanja Papa dari moelai sembajang sampe bakar kertas tinggal berdiri dengen soedjoed, tapi kali ini abis sembajang lantas masoek ka kamer.

Djoega ini kali Papa sembajang ada seperti bijasa ja-itoe 3 kali koei 9 khauw-sioe (samkoei kioe khouw). Tjoema ini kali saja sama soedara GIN HAN sedija dari blakang, bantoe angkat kaloe Papa dari koei maoe berdiri.

Sebab Papa sasoedahnja sembajang lantas masoek kamer, maka kita anak-anak jang djaga medja sembajang. Sasoedahnja djam 1 saja hendak bakar kertas, sebab saja kira tentoe Papa di kamer menoenggoe tida tidoer. Tapi ini, GIN HAN tjega dan maoe tanja doeloe ka dalem. Dapet penjahoetan dari Mama jang pesennja Papa djam 1½ baroe boleh bakar kertas. Maka di djam 1½ kertas baroe moelai di bakar.

Dari kamer Papa lagi-lago soeroe lihat medja sembajang di loear, apa lilin-lilin menjalanja ada bagoes. Di kasih penjahoetan pada Papa, jang lilin-lilin menjalanja ada bagoes, sebab sabetoelnja itoe malem menjalanja lilin ada bagoes, beda dari tahoen jang soedah, jang di malemnja sembajang ada begitoe banjak angin, sampe lilin ampat-ampatnja (bijasanja pake 4 lilin) djadi mati.

Betoel medja sembajang tida koerang apa-apa dan lilin menjalanja ada bagoes dan rata, tapi teboe kaloe orang manghadep ka medja sembajang, di sbelah kiri ada rebah. Ini teboe ada sadja jang bawa kloear boeat dibakar thungtjhie-nja (kertas pandjang), dan satoenja jang seblah kanan, soedara GIN HAN jang bawa kloear, tapi di itoe waktoe kita tidak ada jang dapet lihat. Blakang hari sasoedahnja Papa meninggal baroe ada orang bilang, jang itoe satoe teboe sebla kiri ada rebah, ja-itoe jang dapet lihat orang-orang jang berdiri dari djaoeh dan dari samping. Djoega blakang hari saja dapet denger, jang di Luwunggadjah djoega begitoe, satoe teboe sebla kiri rebah, sebab disana djoega di itoe malem ada di bikin haus Thie-Kong.

Paginja 9 Februari Papa dari koerang tidoer tida apa-apa, seger seperti bijasa.

Di hari Minggoe 10 Februari Papa ada panggil toekang tjoekoer boeat goenting ramboet dan sahabisnja itoe, Papa goenting, kerik dan bikin bersih koekoe-koekoe pake tempo lama sekali, lebih lama dari bijasanja.

Di malem 14 dan 15 Februari di kota Cheribon maoe di bikin arak-arakan (optocht) tjeng-ge, maka boeat ini ada di datengken toekang-toekang kertas dari Semarang. Maka kabetoelan sekali boeat oeroesan meninggalnja Papa, ini toekang-toekang kertas ada di Cheribon. Dari keramean tjeng-ge menoeroet karempoegannja orang banjak di oeroengken, sedeng laennja keramean tahoen baroe dari itoe 12 Februari sore di brentiken.

Di straat Tjangkol ada satoe roemah besar kita, tadinja di sewa boeat hotel oleh toean Horning. Di tahoen 1918 ini roemah di minta oleh saja punja mantoe THE SIEN HOEN boeat toko dan bengkel auto pake merk Cheribonse Autodrome, tapi zonder saja tahoe SIEN HOEN rombak pintoe loear dan pintoe dalem dari hoofdgebouw di ganti dengen pintoe-pintoe jang besar-besar dan tinggi-tinggi, soepaja autos jang besar-besar bisa gampang masoek-kloear, bae dari moeka bae dari blakang dan di blakangnja itoe hoofdgebouw dibediriken satoe loods jang besar, serta kamer-kamer di bijgebouw sebla kanan di rombak di bikin kamer-kamer jang besar. Pinggirnja pekarangan diblakang, jang tadinja masih terboeka, SIEN HOEN pasang tembok, soepaja pekarangannja itoe roemah ketoetoep dengen pager tembok jang orang tida bisa masoek. Jang SIEN HOEN berdagang auto saja baroe tahoe sasoedahnja ini di bikin djadi, dan sebab dari ini saja tida rempoeg, maka saja ada toelis sama Tjhinke PIK PIEN, tapi saja tida sekali maoe kasih advies boeat bikin
oeroeng apa jang soedah di bikin djadi. Di blakang hari Tjhinke dapet tahoe jang SIEN HOEN berdagang auto dapet banjak roegi, maka di boelan Januari itoe toko di brentiken dan barang dagangannja di djoela. Tempo itoe barang-barang lagi diangkati, soedah ada orang jang dateng minta sewa itoe roemah, tapi belon di kasih. Baroe sadja itoe roemah djadi kosong dan di bikin bersih, tida brapa hari lagi Papa meninggal doenia, maka itoe roemah jang ada poenja tempat jang lebar-lebar dan pintoe jang besar-besar, apa lagi itoe roemah ada deket Pasoeketan, ada kabetoelan sekali boeat tempatnja toekang-toekang kertas kerdja.

Pembelian karoeng goenie boeat goela Luwunggadjah tahoen 1918 soedah dibikin contract, tapi lantaran Handelsbank dapet kawat itoe karoeng goenie brangkali tida bisa di lever, sebab soesah dapet kapal lantaran ada perang besar di Europa sedeng giling soedah deket, maka Handelsbank kasih advies boeat selekasnja sedija sekiranja doeloe kadjang. Dari itoe lantas saja kawat beli kadjang. Sasoedahnja kadjang di beli, Handelsbank dapet kawat lagi jang karoeng goenie bisa dateng. Lantas saja kawat lagi boeat bajar karoegian dengen pembelian kadjang di oeroengken, tapi jang djoeal tjoema bisa trima boeat di oeroengken sebagian sadja. Ini kadjang saja titipken digoedangnja Piauw-moaijhoe TJAN TJOEN JONG dan saja soedah soeroe tawar-tawarken boeat di djoeal lagi, kendati dengen roegi, tapi belon sadja bisa lakoe, maka kabetoelan sekali ini kadjang bisa di pake boeat bediriken banjak taroeb-taroeb di pakoeboeran DOEKOESEMAR dan die roemah. Sebab pakenja kadjang ada banja sekali, maka kaloe moesti beli tentoe moesti di pesen doeloe jang datengnja tentoe laat.

Pada 10 Februari kita trima soerat dari Pangeran ARIO KOESOEMOJUDHO, Solo, jang atas namanja Toean Soesoehoenan ada mintaken pondok boeat soedaranja Toean Soesoehoenan, Pangeran ARIO PRABOENINGRAT, Luitenant Kolonel, dengen Raden Ajoenja, jang itoe waktoe ada di Betawi, kaloe dia-orang nanti dateng di Cheribon. Lantas di kasih kabar ke Solo dan Betawi jang kita soeka trima dengen seneng hati, sekalian di kasih tahoe jang di malem 14 dan 15 Februari
di Cheribon bakal ada keramean tjeng-ge. Ini Pangeran djadi dateng pada hari Djoemahat tengah hari 14 Februari bersama anak-anak kita jang dari Betawi di panggil poelang, djadi sasoedahnja Papa meninggal. Ini Pangeran toenggoe dan berhadlir dengen berpakean officier uniform item (groot tenue) koetika Papa di masoeken peti. Tapi heran jang ini Pangeran ada bawa dari Solo dari Toean
Soesoehoenan boeat Papa 2 flesch besar (flesch jenever) aer mawar dan satoe kaen pandjang, batiknja Prang Kesoemo, dasarnja item kebangnja sogan. Ini  herannja ada seperti Toean Soesoehoenan soedah dapet perasaan lebih doeloe jang bakal di tinggal oleh Papa, maka itoe Pangeran ada dibawai kaen pandjang maksoednja seperti boeat roeroebnja (selimoet) djinazat dan aer mawar maksoednja seperti boeat mandinja djinazat dan boeat siram di koeboeran, maka itoe aer mawar di pake boeat menjirati djinazatnja Papa dalem peti dan lebihnja boeat menjiram koeboeran, sedeng itoe kaen pandjang toeroet di masoeken dalem peti oleh tangannja itoe Pangeran sendiri. Toean Soesoehoenan sama Papa, kendati baroe ketemoe satoe kali, tapi ada sama seperti orang jang soedah kenal dan persobatan lama. (Pembatja djangan salah mengerti. Toean Soesoehoenan saja rasa tentoe tida dapet tahoe lebih doeloe, jang Papa bakal lekas meninggal, tjoema saja maoe bilang sadja dari herannja itoe barang, kenapa bisa begitoe kabetoelan. Begitoe djoega saja heran jang Toean Pangeran ada kabetoelan bawa costuum officier item, maka dia bisa pake itoe costuum koetika berhadlir waktoe djinazatnja Papa maoe di masoeken peti).***Deddy Madjmoe dari berbagai sumber.