Wafatnya Majoor Tan Tjin Kie Bagian 1

Dari telusur pustaka internet kami mendapat informasi wafatnya sang Mayor Tan Tjin Kie yang kebetulan dipublish dari sebuah buku.

Peringetan boeat familie dari hal-hal Kedjadian jang berhoeboeng dengen meninggalnja Padoeka Papa

Majoor TAN KENG BIE

(Majoor TAN TJIN KIE), sampe slesi dengan mengoeboer djinazatnja

Padoeka papa moelai berobah kewarasannja sasoedahnja saja poenja anak prampoean DICKY (GWAT ENG) kawin, ja-itoe di tahoen 1916, brangkali dari sebab di itoe waktoe Papa banjak tjape dan koerang tidoer, sebab nikanja Dicky djoega ada di rajaken dengen keramean besar.

Di tahoen 1917 Papa soedah moelai tempo-tempo dapet sesek dan di tahoen 1918 kaki tempo-tempo soeka bengkak. Menoeroet perbilangannja Dokter ini semoea dari djantoeng jang soedah djadi koerang koeat, maka Dokter ada kasih nasehat soepaja Papa djangan banjak kerdja dan kaloe masoek tidoer soepaja djangan lebih laat dari djam 10 malem. Kaloe Papa bisa djaga diri, Dokter bilang Papa masih bisa hidoep lama sekali dan Dokter ada kasih obat tetes boat di minoem kaloe dapet sesek.

Di boelan Juni 1918 Papa dapet sakit sedikit berat, maka Dokter E. GOTTLIEB panggil consult Dokter C.D. DE LANGEN dari Betawi, tapi di itoe waktoe slamet Papa djadi bae kombali.

Dari 1 (Senen) sampe 21 (Minggoe) October 1917 (djadi dapet 21 hari) Papa tetira di Koeningan.

Dari kira-kira pertengahan October 1917 sampe 12 December, hari Rebo, Papa tetira di Tambak dapet kira-kira 2 boelan.

Dari 17 Juli, hari Rebo, sampe 3 November 1918, hari Minggoe, djadi dapet 31/2 boelan, Papa tetira di Pesisir.

Dari 3 November sampe kira-kira pertengahan December 1918, djadi dapet 11/2 boelan, Papa tetira di Kalitandjoeng.

Papa dateng penghabisan kali di Luwunggadjah pada hari Djoemahat 27 December 1918 ja-itoe di waktoenja anak-anak vacantie dan tinggal disana sampe liwat tahoen baroe Belanda.

Sebab di itoe waktoe Papa dan Mama maoe dateng disana bersama semoea anak-anak dan itoe anak-anak ada nakal-nakal, maka tadinja saja nijat bangkoe dan korsi jang pake soetra tinggal di saroengin, soepaja tidak kena di bikin kotor oleh anak-anak, tapi sebab menginget Papa ada djarang-djarang dateng di Luwunggadjah, maka oentoeng sekali jang itoe meubel saja soeroe boeka saroengnja dan bendera di tiang di atas gedong Binarong dan di atas gedong fabriek di kibarken dan ini bendera-bendera baroe di toeroenken, sesoedahnja Papa poelang ka kota. Papa Mama poelangnja dari Luwunggadjah bersama anak-anak pada hari Kemis 2 Januarii 1919, djadi tinggal disana tjoema dapet satoe minggoe.

Di Binarong, Papa ada lihat serta denger soewaranja Gramophone dan Pianola jang baroe dateng dari Amerika. Djoaga Papa ada pergi naek lorrie sama Mama dan anak-anak lihat kebon-kebon teboe dan Papa kelihatan ada seger.

Papa ada banjak seneng hati, jang goela kloearan oogst 1918 jang tida bisa dapet banjak di djoeal, lantaran harga goela ada keliwat rendah dan toeroen-toeroen sadja, achirnja di penghabisan tahoen 1918 bisa di djoeal dengen harga bagoes sekali, sedeng boeat goela oogst 1919 lagi-lagi dapet tawaran tinggi jang harganja naek-naek sadja.

Sedari sabelon tahoen baroe saban malem ada kadengeran soewaranja boeroeng Dares dan semingkin lama semingkin serig kedengerannja itoe soewara di waktoe malam, sampe saja poenja bini dalem tempat tidoer sering kata : "tida enak sekali ada itoe soewara, setahoe maoe ada apa di kota Cheribon, apa brangkali bakal ada penjakit?" Tapi di malem 12 ka 13 Februari antero malem soewaranja Dares tida ada brentinja, jang kadengeran terbangnja rendah sekali. Sasoedahnja Papa meninggal baroe itoe soewara Dares ada koerang dan mingkin lama mingkin djarang.

Pada 13 Februari betoel dimana waktoenja Papa meninggal, djadi waktoe sijang, di loear orang geger, jang ada boeroeng Dares ngelabak terbang meliwati atas roemah Papa dari Lor-koelon ka Wetan-kidoel. Lantas sakoetika itoe djoega dari kamer-Papa orang mendjerit lihat Papa pangsan, tapi sabetoelnja boekan pangsan, sebab sakoetika itoe djoega Papa soedah meninggal.

Di hari-hari tahoen baroe (menoeroet Papa poenja bilangan moelai dari hari penghabisan tahoen lama, djadi di 31 Januari 1919 hari Djoemahat Manis, tapi di itoe hari saja sendiri tida dapet lihat soedah ada itoe boeroeng) sampe di hari deketnja Papa maoe meninggal, ada satoe boeroeng Sikatan saban hari masoek njanji di moeka katja-katja besar dalem roemah. Disitoe baroe saja tahoe jang boeroeng Sikatan bisa mengotje begitoe enak. Ini boeroeng ada kelihatan girang sekali, dari satoe katja terbang ka laen katja, memaen di moeka itoe katja-katja dengan kasih njanjiannja jang njaring, seperti dia ada girang lihat ada temennja dalem katja. Kendati sering-sering di gebah kloear oleh djongos-djongos, tida oeroeng lagi-lagi dia dateng lagi. Amper di antero waktoe dari saban hari itoe boeroeng ada di dalem roemah, terbang sabentar kloear, lantas dateng masoek lagi. Papa dan saja seneng hati dengerken njanjiannja jang tida brenti-brenti, seperti itoe ada satoe alamat baik, siapa tahoe brangkali kita dapet kaoentoengan bagoes dari goela, maka saja larang djongos-djongos djangan gebah dia lagi.

Sasoedahnja Papa meninggal baroe ketahoean jang itoe boeroeng dalam 3 hari, 9, 10 dan 11 Februari, troes-meneroes saban-saban mentjlok di korsi, jang biasanja Papa doedoek minoem thee di waktoe sore. Ini tjeritaan ada dari djongos-djongos dan baboe-baboe jang ada banjak berdiem di itoe tempat makan. Itoe boeroeng Sikatan dari hari 12 Februari tida kelihatan dateng lagi.

Di malem pengabisan tahoen lama (oudejaarsavond, 31 Januari 1919) Papa tida toeroet makan, sebab di rasa tida enak badan, djadi troes masoek tidoer, tapi paginja di hari tahoen baroe, Papa soedah djadi seger kombali, kloear berpakean thungsha boeat sembajang dan boeat paij-koei sama Mama-besar (Mamanja Papa) serta boeat trima familie dateng paij-koei tahoen baroe. Sahabisnja Papa ganti pakaean putih, kloear di voorgalerij dan lihat bloemstukken (kembang-kembang) jang ada diloear, kiriman dari familie EIJKEN, Assistent-Resident, dari familie DE GRAAG, President Landraad, dari familie GALLOIS, Agent Escompto, dan dari laen-laen familie. Kebetoelan itoe waktoe toean EIJKEN liwat dan lihat Papa ada di loear lantas masoek kedalem omong-omong sampe kira-kira ½ djam lamanja.

Dari moelai tahun 2466 (1915) Papa saban tahoen tida trima tamoe.

Dari hari tahoen baroe troes sampe 12 Februari Papa ada seger, tjoema tempo-tempo soeka ada sesek.

Di tahoen baroe Papa soedah djandji sama Dr. GOTTLIEB boeat bantoe bediriken roemah sakit di kota Cheribon f 10000, dan kasih pada Tiong Hoa Hwe Koan Cheribon aken beli roemah Hwe Koan f 10000, sedeng kenijatan boeat bediriken mesigit boeat orang Islam di Luwunggadjah di nijat di djadiken dalem ini tahoen 1919. Boeat bediriken mesigit Luwunggadjah soedah di nijat lama, tapi sebab ini mesigit di nijat dibikin jang bagoes boat bisa toeroet djadi perhijasan fabriek, maka moesti di pilih di bediriken di mana tempat jang deket dengen laen-laennja gedong poenjanja fabriek, tapi jang tida kwatir di blakang hari, kaloe fabriek di besarken kena kebongkar, dan sebab kita sampe di tahoen 1917 masih riboet dengen berobahan Luwunggadjah, maka kenijatan bediriken mesigit djadi di oendoerken sampe di ini tahoen dan boeat ini, sabelonnja Papa meninggal, saja moelai atoer teekeningnja.

Pada hari 7 of 8 Februari saja ada panggil toekang tjoekoer dan saja soedah boeka djas-loear maoe doedoek boeat goenting ramboet, saja lihat Papa kloear, lantas saja inget brangkali Papa maoe goenting ramboet, Papa bilang laen hari sadja, sebab kepala ada koerang enak.
***Deddy Madjmoe dari berbagai sumber.